Monday, 30 May 2016

طرشي ومخللات



طرشي ومخللات
...
طرشي مدبس ..اسلق الخضار سلق خفيف بماء وملح وشويه خل ..طبعا كل نوع لحاله وايضا اضيف كركم للماء المغلي ..ومن تبرد الخضار اكون مجهزه العلبه او الحافظه ..وبكاسه اضيف دبس وتمر هندي مصفى وملح وخل احمر واخففه بالماء الي غليت بيه الخضار بعد مابردته تماما ..وابدي اضيف الخضروات بالعلبه على طبقات ورشه كزبره وحبه سودا وبعدين خلطة الخل والدبس والتمر هند وطبعا اتذوق الملح ..وينترك حوالي ٣ ايام وتكدرون تاكلونه ..
النوع الثاني ...طرشي الباذنجان المقلي ( اول مره اسويه واخذت الطريقه من ابو علوش )وطلع رهيب ..
ناخذ الباذنجان حجم صغير ونغليه مو ينهري لا مثل المكدوس ..نصفيه وياريت لو قبل يوم وتتركه ينشف تمام ..ويقلى بالزيت ..
ونكون محضرين حشوه ( بقدونس -ثوم -نعنع مجفف-وكزبره مطحونه وفلفل اسود او احمر حار )تبقى بكيفكم انه صراحه الحشوه مالتزمت بطريقته الي عندي ضفته
بعد مايبرد نحشيه وطبعا الملح ماننسه للحشوه ..ويصف في علبه ونضيف خل احمر وملح وزيت زيتون شويه على الوجه وره ٣ ايام تكدرون تستعملوه ..
مخلل الفلفل الاخضر الحار او الهلابينو ..
وتنفع للناس الي تحب الاكل الحار وللسندويجات ..الي يحبونه خلي يسووه قبل رمضان ..لان برمضان اعرف صعب واحد ياكل حار ..بس انه اكل مايهمني 😉
تاخذون الفلفل وتقطعوه حلقات وبالطاوه تخلون زيت زيتون وتضيفون ملعقة شاي كزيره وكمون وفلفل اسود وتحمسوه بالطاوه وثوم مهروس وتحمسوه على السريع وتضيفون الفلفل المقطع وتقلبوه مع رشه الملح ..بس يتغير لونه رفعوه وتركه يبرد وبالعلبه المعقمه خلوه ويه الخل الابيض واذا تحبون حلقات ليمون ..وتركوه هم يومين ٣ ايام وبعدين حفظوه بالثلاجه ..ياسلام على النكهه والطعم 👍🏻مخلل اافلفل الاحمر ..هذا من اختراعي ووليد اللحظه مثل مايكولون وانه اخلل اجه ببالي ..الفلفل زلت القمع مالته بس مو مثل المحشي لا بس الراس والقلب ..ورشيته ملح وتركته كم ساعه لحد ماذبل وراها حضرت الحشوه ( حمست جزر مبروش وبس نشف المي مالته تركته يبرد وبعدين ضفت الثوم المهروش والبقدونس المفروم والكزبره وحبة البركه ورشه بهارات عمبه ورشه فلفل احمر حار وملح )وحشيته بيه وضفت الخل المخفف بالمي ومله اكيد ورشة نعناع مجفف وتخلل يبقى هم اربع خمس ايام وتكدرن تستعملوه ..الف عافيه
مدة الحفظ تعتمد على الجو اذا حاره بسرعه يستوي واذا بارده شويه يطول


Kawthar Karim

0 comments:

Post a Comment

الوصفات الشائعة

counter

Flag Counter

 

أشترك معنا عن طريق الايميل

X