Tuesday, 1 December 2015

كفتة مشوية بالصلصة البيضاء



اللي صار انه ردت اسوي كباب بيتي وما كان عندي كمية لحم مثروم كافية 
فسويت اكلة وراح اسميها كفتة مشوية بالصلصة البيضاء

المقادير 
الكفتة:
لحم مثروم
كرفس مثروم (او معدنوس حسب الرغبة)
بصل اخضر مثروم 
طماطة مثرومة ناعم كلش
ملح حسب الرغبة ورشة فلفل اسود 
مع حفنة طحين (اني استعملت اسمر)

باقي المكونات:
حليب 
نص كوب جبن خالي او قليل الدسم موزريللا مبروش
فلفل اسود
ملح
بطاطا مقطعة مكعبات صغيرة 
فطر مقطع قطع صغيرة 
عصير ليمون حامض

مع زيت قليل
العمل:
اخلط مكونات عجينة الكفتة كلها واحمي طاوة عريضة وأخلي ملعقتين زيت وأخلي الكفتة بشكل كرات واحمسها بالزيت بس عالوجهين بحيث يتغير اللون اني ما اريد اخليها مستوية تماماً لان راح اكمل بالفرن عملية النضج

احضر تبسي (صينية ) فرن تكون حافاته مرتفعة اني شخصيا استعملت صحن فرن سيراميك لان الاكلة راح تقدم مباشرة عالسفرة
اخلي بيه طبقة من البطاطا المثرومة وارش عليها رشة ملح وفلفل اسود واجيب الكفتة وارصها فوكاها وبعدها طبقة اخرى من البطاطا
الان اجيب الفطر واشوحه(احمسه) بنفس الطاوة اللي سويت بيها الكفتة حتى يكتسب الطعم وارش عليه ملح وفلفل اسود
وارصه على طبقات الكفتة والبطاطا بصحن الفرن
بنفس الطاوة اخلي تقريبا كوب حليب خالي الدسم وأخلي بيه ملح ورشة فلفل وعصرة ليمون والجبن المبروش واخليه شوية يتماسك واصبه عالمكونات الاخرى لحد بس يغطيها
الفرن يكون حامي بدرجة ٣٩٠ فهرنهايت (١٩٠ مئوي ) واغلف صحن الفرن بورق القصدير او الالمنيوم وادخله الفرن
بعد ساعة وربع اشيل الورق وأخلي الصحن بالفرن ربع ساعة ويكون جاهز للتقديم
اني ثرمت معدنوس ورشيته عليه قبل ما اخليه عالسفرة وألف عافية مقدما
زنوبيا








0 comments:

Post a Comment

الوصفات الشائعة

counter

Flag Counter

 

أشترك معنا عن طريق الايميل

X