Wednesday, 30 July 2014

للحصول على بركر شهي واطيب من المطاعم



جايتكم بوصفة همبركر خصوصي للمغتربين وأكيد أهلنا وحبايبنا بالعراق الغالي ربي يحفظ الجميع

اول شي شغلتين مهمة بعمل الهمبركر الوصفة وملاحظات تخص طريقة الشوي اذا ما تتبعوها احسن وصفة ما تنجح 

تخلون بالكم زين وية الملاحظات

الطريقة: لحم مثروم نصف كيلو يفضل نسبة الدسم ٢٠-٣٥٪ طبعا ممكن عمله باللحم قليل الدسم بس الدسم هو اللي ينطي طراوة وطعم 

فصين ثوم مهروسين نااااعم

فلفل اسود حسب الرغبة 

اني ضفت عودين كرفس مفروم نااااعم جداً فقط للنكهة لانه اللحم هنا مو مثل لحمنا العراقي الطيب 

رشة بقسماط رشة فقط 

اول ملاحظة: مااااااااكو ملح هسه أبد أبد 
لانه الملح يسحب السوائل باللحم وينشفه راح اكوللكم بعدين شوكت تضيفون الملح

ملاحظة رقم اثنين: اللحم مو تعجنون بيه ومدري شنو لا لا لا على هوا أيدكم مثل ما يكولون كلللللش بخفة ونزاكة تخلطون الفلفل والثوم المهروس والكرفس مع اللحم حيييييل بهداوة

هسه الخليط ما نشويه راسا لا ندخله الثلاجة عالاقل نص ساعة وإذا بيتوه ليلة بعد النتيجة تكون افضل

نجي عالملاحظة المهمة الاخرى : للحصول على همبركر متساوي الأحجام مو وحدة صغيرة ووحدة كبيرة تقيسون الخليط بمقدار ثلث كوب يعني تستعملون الأكواب القياسية او اي شي يساعدكم تقيسون اللحم بشكل متساوي مثلا كاسة صغيرة او أستكان 

تقيسون وتطلعون الطوبة مال الخليط وتضغطون بخفة بحيث تسووها بشكل الهمبركر مو ترفعوها كلش وسط تكون 

الان عملية الشوي سهلة للي عنده شواية اي نوع واللي ماعدهم يستعملون طاوة حديد المادة مالتها ( مو تيفال) لانه الحديد يبقى محافظ عالحرارة ولذلك ما تصعد وتنزل بكيفها بينما التيفال يحمى بسرعة ويبرد بسرعة فيصير تفاوت باستواء اللحم 

نجي نسوي اول وحدة نخلي ملعقتين زيت بالطاوة الحديد cast iron جماعة امريكا تعرفوها يحمى الزيت ولاااازم يحمى زين (بس مو يحترك) لانه اذا مو حامي راح يمص سوائل الهمبركر وينشفها وكذلك ما تستوي زين كلها

نضع الهمبركر ونتركها وهسه اجه وقت الملح نرش عليها رشة زينة بسسسس ما نقلبها أبد أبد الى تفوت الدقائق المطلوبة لكل وجه 
وهذا جدول بسيط لموعد قلب الهمبركر عالوجه الاخر حسب استواء اللحم

قريب للنئ rare : ٣ دقايق وتقلبوها
متوسط medium : ٤ دقايق وتقلبوها
مستوي تماماً well done : ٥ دقايق 

اني بقيتها ٧ دقايق للاحتياط

الان نقلب عالوجه الاخر نلاحظ صار بيها لون بني حلو ونرش ملح على هذا الوجه وننتظر ٧ دقايق لحين الاستواء ونطلعها 

ملاحظة جداً مهمة وعادة الأغلبية يسووها بس هي خاطئة حسب رأي الشيفات العالميين ممنوووووع الضغط عالهمبركر باي اداة او سباتيولا او جفجير ممنوع منعا باتا لانه راح نطلع السوائل منها وما يبقى بيها طعم وطراوة اتركوها وهي تصير حلوة وحبابة هههههههه

الهمبركر فيكته ماكو ملح قبل الشواء ؛ ماكو ضغط عليه عند الشواء اتبعوا هذي الملاحظات بحذر وراح تدعولي 

ورة ما نطلعها نتركها ٥ دقايق قبل ما نخليها بالصمون او الخبز حتى تنسد مسام القطعة وتبقى طريقة وطيبة 

أتمنى تجربوها وتدزولنا الصور مو تنسون 

وآسفة لان طولت عليكم

زنوبيا

0 comments:

Post a Comment

الوصفات الشائعة

counter

Flag Counter

 

أشترك معنا عن طريق الايميل

X