Thursday, 3 April 2014

روبيان على رز الوان والخضار



طريقة الروبيان على تمن الالوان والخضره
كيلو تمن بسمتي مغسول ونكوع نص ساعه ومصفى
كيلو روبيان مقشر ومنضف ويفضل بدون قشر
نص كيلو خضار مشكله يعني فروزن كلنه نعرفها وهي مكوناتها واضحه وحاولي من تموعيها تعصريها من الماي
ملح -وفلفل- م كوب زنجبيل مطحون- م كوب كركم- م كوب صبغ اللوزينا - ورقتين غار- م كوب كاري - مكعبين ماجي ( كوب ماااء فقط)
نصف قالب زبد - كوب زيت
م اكل صويا صوص - م اكل خل ابيض
نص باقة معدنوس- نص باقة شبنت - نص باقة كزبره طبعا هاي كلها فريش
مع راس بصل كبير مثروم ناعم كلش -و4 فصوص ثوم مهروسه - وملعقه اكل معجون طماطه
طريقة العمل**
تحضرين طاوه وتاخذين ملعقة زبد ومن كوب الزيت تاخذين ملعقتين فقط وتتركين الباقي - تموعين الزبد مع الزيت لتخلي ينحرك بس تسيحينه ويبدي يحمر لونه تضيفين البصل مع رشه ملح صغيره وتقلبين لحد مايحمر شويه وبعدها تضيفين الروبيان وتقلبيه مدة 3 دقائق وترفعي من الطاوه وترجعين تضيفين نص كمية الخضار الي هي فاصوليا والجزر والذره والفلفل مثل مامبينه كدامكم بالصوره ويه الروبيان وتبدين تحمسين الى ان تذبل عندج بس على نار عاليه وتضيفين -الكاري -والزنجبيل -وفلفل اسود -والثوم المهروس بسسسس - وتمزجيهم مع بعض الى ان تستوي وراها ترجعين الروبيان فوك الخضره وتفتفتين المكعبات الماجي والصويا صوص والخل وتخلطيه وعلى نار عاليه بس تموع المكعبات الماجي وتضوكينه وتقتنعين بلملوحه مالته طفي وشيل الخلطه من الطاوه ونقليها ب طبق حتى ليكمل سواه لان الروبيان ميحب هوايه طبخ بعدين ايجلد*
طريقة باقي الخضار :- تاخذين باقي الخضره وتسلكيها مع مكعب الثالث من ماجي وفلفل اسود ** طريقة طبخ الرز ** اتقسمين الرز 3 اقسام بلتساوي وتحضرين 3 جدوره نفس الحجم راح نبدأ بل الرز الاصفر عادي ويه الكركم كلنه نعرفه ويه ملح واني احطله ورقة غار بس تاخذين من الزبد ملعقة اكل وملعقتين زيت وتطبخين التمن الاصفر مالتنه العادي*** وهسه تمن البرتقالي نفس الطريقه الزبد والزيت سوه وتضيفين صبغ اللوزينا والمعجون وتحمسين قسم الثاني من الرز مع ملح ورقة الغار وتطبخينه عادي الى ان يستوي*** هسسسسسسه اجينه للجد هنا تستعملين خلاط الفواكه الي مثل الدولكه شكلها وتضيفين بيها النعناع والشبنت والمعدنوس وهسه اجه دور كوب ماء تخلطيهم بالخلاط الى ان تتكون عندج صلصه مثل البوريه ولونها ناصح الخضار نفس طريقه زبد وزيت بالجدر وتحطين السائل الاخضر كله والرز الوجبه الاخيره وطبعا تطبخي بس اتحاولين لا هوايه ماء لان الخضره هي تذب ماء بس شويه تغطيه مع ملح طبعا
و صدكوني راح تطلع ريحه روعه * وحاولي الرز ميتعجن عندج تبقى الحبه مثل ما بلصوره (ملاحظه بهل الوصفه مال الرز بثلاث انواعه متضيفون من عدكم اشياء اضافيه لا هيل ولا غيره لان هذا الرز طعمه بل نكهات الي بي او ويه الروبيان ميحب هوايه طعم والا اني مثلكم احب البهارات:) و هسه حبايبي تبدين تصبين بماعون او صينيه من النص اول تمن وفوكاه الروبيان مثل بالصوره يعني تغطين الرز بي وبعدها اللون الثاني وراها اللون الثالث و اخيرا وليست اخرا معكم انشاالله تصفين الخضار الي سلكتيه جيدا من الماء و تزينين الرز مثل ما اني مزينته على الحواف باقي الخضار والسلام عليكم^_^( شيف ميمي) عافيااااااااااااااااات على قلبكم (ملاحظه) راح تلاحظون بالصوره كميه جبيره هاي اني جنت مسويتها الصينيه ضعف الكميه الي وصفتها الكم

No comments:

Post a Comment

الوصفات الشائعة

counter

Flag Counter