Saturday, 13 April 2013

حلاوة قشور البرتقال

حلاوة قشور البرتقال من ندى

 : اولا نقعت القشور بالماء لمدة اسبوع مع تغيير الماء يوميآ



بعدين سلقتها عالنار لمدة ربع ساعة

صفيت القشور بعد السلق وغسلتها بالماء البارد

سويت شيرة 4كوب سكر و2 كوب ماء ونصف ملعقة شاي حامض ليمون دوزي خليتهه عالنار لمن بدت الشيرة تعقد رفعتها عن النار آني خليت نص ملعقة شاي هيل اختياري

ثرمت القشور بماكنة الثرم لعدة مرات حتى صار ناعم كلش

هاي صار بعد الثرم كلش ناعم


طبخت الشيرة والقشور المثرومة عالنار لمن نشفت كلش وامتزجت جيدآ رفعتها عن النار حتى تبرد وصارت عجينة متماسكة




هاي العجينة بالاخير صارت


كورت قطع صغير بأيديه ولوثتها بمبروش جوز الهند

وتقدم بالف عافية

الخبز المحشو بالمشروم والاوريغانو

الخبز المحشو بالمشروم والاوريغانو
وصفة سريعة ولذيذة تنفع للعشاء
المقادير
خبز الباجيت الفرنسي
مشروم طازج
رشة ملح وفلفل اسود
اوريغانو
زيت زيتون او زبدة
جبن كريمي
جبن شيدر او جبن موزريلا
اول خطوة نقطع الخبز حلقات بدون ان نقطعه للنهاية يبقى مرتبط الخبز من الاسفل
نحضر الخليط على جهة
نقطع المشروم ونضيفله رشة ملح  وفلفل واوريغانو وزيت الزيتون
نمسح بداخل شرائح الخبز بالجبن الكريمي وممكن بالزبدة اذا متوفر الجبن
ونبدي نحشي الخبز بالحشوة  وبعد الحشوة نضيف شرائح الجبن بداخلها
على الوجة نضيف رشة زيت زيتون ورشة اوريغانو
نسخن الفرن  وناخذ ورق الزبدة ندخله بالماء نبلله ونلف الخبز بيه  ونضعه بصينية الشوي
الغرض من لف الخبز بالورق الزبدة المبلل حتى يحافظ على الخبز طري ومايبس بالفرن
نبقيه بالفرن لمدة عشر دقائق تقريبا ويقدم بعدها بالف عافية
ممكن نضع مع الحشوة دجاج مسلوق حسب الرغبة
ايمان






الكرواسون

الكرواسون من مطبخ ميمي

مساء الخيررر ،، يله حبايب هاي الطريقه والمقادير ،، كيلو طحين ابيض منخول ،، نص كيلو زبد ،، ملعقه اكل خميره فوريه ،،

 ملعقتين اكل سكر ،، ملعقه اكل ملح ،، كوبين ماء بارد ،، لدهن الكرواسون بيضه وثلاث معلاق كريمه الخفق،،، حبايب بهاي الصوره حطيت الطحين والخميره و٥٠غرام زبد،، والسكر والملح فرتها فرتين ست البيت مزجت الطحين ويه المواد وبعدها تشغلون مره اخرى ست البيت وتضيفون الماء ولازم العجينه تصير قويه مو نص ونص بناااات ترى لازم تكون قويه ،، هسه نجي للجد بعد ما تنعجن طلعوها من المكينه وتكروها وتحطوها بطبق عميق زجاجي اوبايركس وتغلفوها بالبلاستك وتخلوها بالثلاجه لمده ساااااعه ونص لاززززم،،،،،، 

هنا حبايب بعد ما خليناها بالثلاجه ساعه ونص ترشون طحين وتشقون العجينه بهل الطريقه لاززززم ،،




هسه عرفتو ليش سويت كروس بالعجينه حتى نفتحها بهل الطريقه ويسهل عليكم فتحها بالشيبك



شوفو حبايب اكو هوايه طرق للزبد حتى تخلو بالعجينه هاي اسهل طريقه الزبد من الثلاجه كبل تقطعو بهل الطريق




وبهل الشكل ينحط وتطون العجينه على الزبد

وتسوها على شكل ظرف ولازم تسون هل ثلاث ثقوب عليها ،،تعرفون ليششششش؟؟ لان راح تخلوها بالثلاجه بعد ماتغلفوها وتبقوها لمده ساعه بالثلاجه فمن طلعوها حتى متفتح مكان العجينه من تعله

هنا بعد ساعه من وره مابقيناها بالثلاجه ترفعون منها لبلاستك وتبدون بالشيبك تدقون عليها حتى الزبد يفرش ويمسك بالعجينه بس مو تضربوها قوي ويطلع الزبد هههه




هنابديت افتحها على شكل مستطيل بالشيبك تقريبا فد خمس مرات يعني كل مره تطوها مثل الظرف وترجعون تفتحوها وهكذا
هسه حبايب تفتحوها بالسكينه بهل الطريقه حبايب ،



وبهل الطريقه تبرموها ولازم حبايب من تبرموها بايد اليسرى تمسكون الطرف الرفيع وتبرمون بايد اليمنى وتجرونعليكم يعني لازم البرمه تكون متماسكه




هنا شكل ثاني بالسكر والقرفه تفتحوها مستطيل وترشوها من النص بالسكر والقرفه وتبرموها من الطرفين بهل الشك

الى ان تصير بهل الشكل وتقطعوها سلايسات

حبايب بعد ما ترصون النوعين بالصينيه ترجعون تغلفون الصينيه بالبلاست وتترك ساعه ونص الى ان يتضاعف حجمه وبعدها تدهن بالبض ولكريمه تخفق مع بعض وتدهن الكرواسون ويخبز على درجه حراره ١٥٠ والمده نص ساعه واذا يحمر عدمم قبلها خلص بس متحركونه من الصينيه الى ان يبرد شويه ،،،





وهذا الشكل بعد ماتنخبز راح يضاعف حجمه وملاحظه لازم تخلون مسافه بيناتهم لان راح ينتفخ كلش


وهذا احلى كرواسون لعيونكم مقرمش وهش واحلى من الي  بالسوك

لاحظو كم طبقع العجينه تصدكون بنات لازم تكون ٧٠ طبقه حتى يطلع بهل الشكل ومتت من التعب هههههه بس تستاهلون حبايب ،،،،


ويقدم بالف بالف عافيه على قلبكم حبايب يله طبقو الوصفه ودعولي اريد اشوف النادرات شلون راح يسولنه كرواسون ويرفعون راسنه ،،،،،،،شيف ميمي


Friday, 12 April 2013

مافن بحبات الشوكولاتة

مافن بحبات الشوكولاتة
المقادير
نصف كوب زبدة او كرسكو
كوب سكر
2بيض حجم كبير
كوب لبن زبادي بدرجة حرارة الغرفة
فانيلا
2كوب طحين
نصف ملعقة كوب بيكنك صودا
نصف ملعقة بيكنك باودر
رشة ملح
شوكولاتة جبس
العمل
نخفق الزبدة مع السكر ورشة الملح ل7دقائق تقريبا وبعدها نضيف البيض  مع الخفق المستمروفانيلا
نخلط الطحين مع البيكنك باودر والصودا ونبدي نضيفة للخليط  مع اضافة اللبن الزبادي  للخليط رح يتكون عجين بيه ثخن مثل ممبين بالصورة5
نضيف الشوكولاتة الجبس بعد ان خلطناه بالقليل من الطحين ونخلط الشوكولاتةمع خليط المافن بالسباتولا
نضع اوراق المافن بالقالب ونبدي نضع خليط بالملعقة وبهالاثناء نسخن الفرن بحرارة 180
نضع المافن بالفرن تقريبا 25 الى 30 دقيقة يكون جاهز
ويقدم بالف عافية
ايمان



ميزان الاسبوع الثالث

ميزان الاسبوع الثالث
يلة بشروني حبايب
المتسابقة ايمان ماكو نزول هذا الاسبوع
المتسابقة mai النزول 200غم
المتسابقة  علياء صعود 600غم
المتسابقة نهر كيلو و300غم
المتسابقة غادة
 نازلة باوند ونص = 0.68 كغم :
المتسابقة شهد نزول كيلو غرام واحد
المتسابقة شوشة ماكو نزول
المتسابقة رواء ماكو نزول
المتسابقة جنان الخسارة كيلو ونص

المتسابقة هدى 700غم النزول

Thursday, 11 April 2013

رز بدبس الرمان

رز بدبس الرمان
مقادير حسب الرغبة
اهنا استعملت
2كوب رز بسمتي
3ملاعق كبيرة دبس الرمان وممكن نزيدها اذا نحبها حامضة اكثر
ملح
قطعة ماجي دجاج او نستعمل ماء الدجاج لطبخ الرز
بصلة مفرومة ناعم
ملعقة كبيرة معجون طماطة
وممكن نطبخها بدون المعجون فقط على دبس الرمان
رشة نومي بصرة مطحون( ليمون مجفف
اول خطوة ننقع الرز لنصف ساعة
نحمر البصلة بالزيت ونضيف الها معجون ونقلبه وبعدها نضيف دبس الرمان والملح والنومي بصرة والماجي ويقلب
نضيف الرز وفوقه الماء  مانضيف ماء هواية  حتى لايلين تقريبا كوب  او اكثر شوية يغطي الرز بقليل
نترك الماء ينشف ونهدي النار الى ان يستوي الرز ويتهدى ويقدم بالف عافية مع الدجاج المشوي بالفرن والسلطة
صحة وعافية
ايمان



كشك الباذنجان

كشك الباذنجان
4حبات باذنجان يقطع شرائح ويملح ويصفى بعدها ويقلى
بصلة كبيرة مفرومة ناعم
2فص ثوم مفروم ناعم
ملعقة كبيرة راشي (طحينة
رشة ملح
ملعقة كبيرة نعناع مجفف
زيت زيتون
3ملاعق كبيرة لبنة حامضة
قليل من عصير الليمون
العمل
بعد ان قلينا الباذنجان وتركته على ورق المطبخ اتخلص من الزيت الزائد اضعه بالخلاط وافرمه
احمر البصل بزيت الزيتون واطلع قليل منهه للزينة
والباقي اضيف له ثوم  ونعناع ويقلب سوية
وبعدها اضيفه للباذنجان ويخلط بالخلاط ويضاف لبنة وراشي ورشة الملح وليمون ويخلط
يصب بصحن ويزين بالبصل المحمر والنعناع ويقدم
جدااا لذيذ
جربوة
صحة وعافية
ايمان



مقبلات


مقبلات
خس مفروم ناعم
ملفوف مفروم ناعم
فلفل احمر مقطع شرائح
حمص مسلوق
فاصوليا حمراء مسلوقة استعملت معلبة
مخلل خيار مفروم
الصوص
عبارة عن 4ملاعق كبيرة لبن زبادي
عصير نصف ليمونة
رشة ملح
ملعقة كبيرة راشي (طحينة
فص ثوم مهروس
كل الصوص يخلط سوية ويضاف فوق الخضار والبقول ويقلب ويضع بالثلاجة لوقت التقديم والف عافية
ايمان

دجاج بالاعشاب


دجاج بالاعشاب


دجاجة تغسل وضفت فوقها خل وتركتها عشر دقائق وغسلتها
حضرت التتبيلة عبارة عن
ملح وفلفل اسود وثوم بودرة

ملعقة كوب زعتر ناشف
ملعقة كوب اكليل الجبل
ملعقة كبيرة زيت زيتون
اقل من ربع كوب خل التفاح
عصير ليمونة 
طبعا راح تصير حامضة والي ميحب الحموضة يقلل من الخ



هذة التتبيلة الاعشاب والخل والملح والفلفل الاسود والثوم والليمون


تخلط الاعشاب كلها بكاسة ويتبل الدجاج ويترك ساعتين الى ثلاثة ساعات يتبل زين



طبخت الدجاجة بالمقلاة المغناطيسية تقريبا ساعة وربع على نار وسط شوية وبعد نصف ساعة اقلب المقلاة حتى الجهة الثانية 
تستوي وتتحمر اثناء الاستواء اصب من الصلصة على الدجاج




وقدمتة مع الرز الاحمر  وعوافي
ايمان





Wednesday, 10 April 2013

جرك

جرك قسم محشي بالتمر والجوز وقسم بدون حشوة
المقادير
5كوب طحين
3/4كوب زبدة او كرسكو
ملعقة كبيرة خميرة فورية
3/4كوب سكر
رشة ملح
تقريبا كوب ونصف حليب سائل دافى
بيضة
رشة محسن الخبز
الحشوة تمر يحمس ويضاف له جوز
للوجة بيضة مخفوقة مع رشة نسكافية
وسمسم
العمل
يخلط الطحين مع رشة المحسن والملح
وبعدها نضيف الزبدة ويخلط سوية الى ان تتجانس الزبدة مع الطحين
نضيف السكر ويخلط
نضيف الخميرة بالوسط ونضيف الها قليل من حليب دافى وتترك دقائق ترتفع الخميرة وبعدها نخلطها مع الطحين ونضيف البيضة وبقية الحليب مع العجن ومنضيف الحليب دفعة واحدة على دفعات وحسب حاجة العجين
راح تتكون عجينة طرية ومتماسكة نغطيها ونتركها بمكان دافى تختمر لمدة ساعة
نبدي نشكل العجين حسب الرغبة
قسم حشيتها بالحشوة ولفيتها وبالجوانب قطعتها بالسكين
وقسم فتحتها ومسحتها بالزبدة ورشة سكر ولفيتها اسطوانة وكل 2اسطوانة الفهم سوية
وقسم سويتها ظفيرة وايضا لفيتها وطبقتها من الاطراف
بعد مااكمل الاشكال اترك الاشكال ترجع تتخمر تقريبا نصف ساعة او اكثر راح تتضاعف
اسخن الفرن بحرارة 190 تقريبا خمس دقائق
وابدي امسح الجرك بالبيض المخفوق مع رشة نسكافية وارش على الوجه سمسم
وادخلها الفرن تقريبا 20 دقيقة تكون جاهزة وهشة وتخببببل وي الشاي
صحة وعافية
ايمان









حلوى الفدج

حلوى الفدج بالدريم ويب والاوريو


هذة المكونات اللي نحتاجها
نصف كوب حليب
100غم نستلة حلويات

رشة فانيلا
كوب سكر بودرة
ملعقة كبيرة كورن سيروب
واحد ظرف دريم ويب
50 غم زبدة
نصف كوب بسكت اوريو مكسر ناعم


اول خطوة نخلط الحليب مع السكر وفانيلا وكورن سيروب والدريم ويب ونضعهم على النار هادئة مع التحريك

نكسر الشوكولاتة ونضعها والزبدة ونخلطهم الى ان تذوب الشوكولاتة

يبدي المزيج يثخن ويلتم ويتماسك من الجوانب مثل ممبين بالصورة5


نرفعة من النار من يثخن المزيج ويلتم واضيف البسكت واصبة بقالب بية ورق زبدة واتركة يبرد



بعد مابردت واتماسكت اقطعها مربعات صغيرة او تكور حسب الرغبة

تحتاج تقريبا 4الى خمس ساعات من نشوفها تماسكت زين


 غطيتها بالكاكاو وتقدم بالف عافية

ايمان






معمول

شوكو معمول 

ومعمول بحشوة الفستق والجوز والتمر
مقادير
3 كوب سميد ناعم

2كوب طحين
3/4كوب سكر
ملعقة كبيرة خميرة فورية
كوب زبد يذوب على نار هادئة
بيضة تخلط وتضاف 
ماء زهر خلطته مع حليب سائل   وعجنت بيه المعمول 
تقريبا ربع كوب ماء زهر و3/4 كوب حليب سائل دافى طبعا حسب احتياج العجين مينضاف كلها سوية شوية شوية مع العجن والعجينة تكون بيها طراوة ممكن اكثر يحتاج وممكن اقل

الحشوة تمر يهرس مع ملعقة زبدة ورشة ماء زهر
جوز يطحن خشن وسكر ورشة ماء زهر او هيل
فستق يطحن خشن وسكر وهيل او ماء زهر
اول خطوة نخلط السميد والسكر والطحين سوية ورشة ملح


نضيف الزبدة المذوبة مع الخلط الى ان يتجانس سوية



اضيف خميرة بالوسط وفوقها حليب سائل واتركها دقائق وبعدها اخلطها واضيف بيضة وابدي بااضافة ماء الزهر والحليب السائل


مع العجن
 العجينة تكون ناعمة وبيها طراوة اغطيها واتركها تتخمر ساعة

بعد التخمير ابدي افتح العجين واحشية واشكلة حسب الرغبة
قسم شكلتها بمنقاش المعجنات 

والشوكو معمول على شكل دوائر تحشى بالتمر
مسحت الوجة بخليط حليب سائل وبيض مسحه خفيفة ودخلته الفرن مايطول هواية راقبوها


بعد الشوي تترك لتبرد وترش بالسكر البودرة
شوكو معمول غطستها بشوكولاتة مذوبة وتركتها الى ان تبرد وتتماسك الشوكولاتة

وتقدم بعد مابردت الشوكولاتة واتماسكت


والف عافية
ايمان
ملاحظة كمية الزبدة ممكن تكون قليلة نوعا ما مقارنة بالطحين والسميد بس اني مااحبها دسمة وممكن زيادة الزبدة الى كوب ونص او كوبين حسب الرغبة







Tuesday, 9 April 2013

معجنات كاري الدجاج بعجينه النعناع

مرحبا حبايب على كل صديقاتي في اكلاتنه الطيبه .. هايه مقادير والطريقه لفطائر

 الدجاج بعجينه النعناع انشالله تعجبكم ... المقادير :- 4 كوب طحين - 50 غرام زبد -

 م اكل خميره - م اكل سكر - م اكل ملح - م اكل خل - نصف كوب كريمه سائله - 2 بياض بيضتين - كوب ماء - ملعقتين اكل نعناع ناشف - ----ى مقادير الحشوه - نصف كيلو صدر دجاج فليه - 2 بطاطه مسلوقه مكعبات - نصف كوب بزاليا - كوب فطر مقطع - بصله كبيره مقطعه - نصف كوب كراث مقطع - ملعقة اكل كاري - ملح - وفلفل - ومعلقتين اكل لبن زبادي خاثر ,,,, هنا اني عجنت كل مواد العجينه مع بعض بست البيت الى ان تصير عجينه عدكم لا لينه ولا قويه وغطيتها بالبلاستك فويل وتركتها ساعه الى ان تختمر ...

هنا بعد ساعه وبعد ما ختمرت زين هذا شكله
هنا حبايب حمست الدجاج وقطعت البطاطه مكعبات صغار بعد ما قشرتها وسلقتها الى ان نضجت وبعدها ضفتها على الدجاج الي حمسته وباقي الخضره واخر شي ضفت الكاري وفلفل والملح,,,,,,,

هنا حبايب تضيفون اللبن اخر شي وتقلبون زين حتى يندمج مع الدجاج وتطفون النار راسا ....
هنا حبايب بعد ما تركتها تختمر ساعه ولاحظو لون العجينه كلها نعناع وتفتحوها بالشيبك وتقطعون على شكل حلقات وتحشوها ....
وهذا شكلها النهائي لذيذه وتجنن والف عافيه على قلبكم وهاي لفيونكات بالقطاعه مال لفيونكات وهاي اختياري مو شرط ,,,,,,ميمي











صمون العراقي

الصمون العراقي من مطبخ نوران الكاظمي
صمون عراقي 
6 كوب طحين\2 ملعقة كبيرة خمرة او نص مكعب خمرة\2 ملعقة صغيرة ملح \2ملعقة صغيرة سكر\2الى 2و2\1 كوب ماء دافئ
نضع نص مكعب خمرة في كوب ماء ونتركة شويه حتى يذوب
نضع الملح والسكر مع 5 كوب طحين ونضيف علية الخمرة والماء الباقي ونعجن مع اضافة باقي الطحين حسب الحاجة حتى تتكون عجينة لا تكون لينة ولا قوية وسط مثل عجينة الفطائر ونتركها تختمر
بعدين نقطعها ونشكلها ونخلي على فوطه ونغطي ونتركه يرتاح لحوالي ساعة ونص

نسخن الفرن على اعلى درجة من الاعلى والاسفل ونخلي الصينية تسخن
وبعدين نخلي الصمون بالصينية الحارة ونشوي وقريب ما يستوي افرج الوجه بشوية زيت
ملاحظة:اذا استعملتي الخمرة الحبيبات نخليها ويه الطحين وممكن اضافة 4\1 كوب زيت للطحين حتى يصير اكثر هش بس اني ما اخلي زيت لان يخلي الصمون يتفتت




كوكيز الشوفان والزنجبيل

كوكيز الشوفان والزنجبيل بسعرات حرارية قليلة

2ملعقة كبيرة زبدة  او مارجرين بدرجة حرارة الغرفة

5ملاعق سكر اسمر طبعا مراح يكون البسكت حلو 
كوب شوفان

بيضة

نصف ملعقة كوب بيكنك صودا
كوب طحين اسمر
2ملعقة كبيرة لبن زبادي قليل الدسم  بدرجة حرارة الغرفة
زنجبيل مجفف
رشة زنجبيل باودر ورشة خفيفة ملح ورشة فانيلا
اخفق الزبدة مع السكر واضيف الها البيضة واخفق وبعدها اضيف الطحين والشوفان والبيكنك صودا ورشة ملح والزنجبيل باودر واللبن مع العجن بخفة راح تتكون عجينة نوعا ما تلصق بالايد اضيف زنجبيل مجفف وقسم ضفت اله شوكولاتة جبس واشكلها دوائر وتضغط على دوائر بالشوكة ادخلها الفرن 180 لمدة عشر دقائق تقريبا واحمر الوجة واتركها تبرد والف عافية 


كوكيز بسعرات حرارة قليلة وتفيد الدايت يقدم وجبة فطور او كعصرية قطعة مع الشاي لذيذ

ايمان




كبة برغل وسميد

كبة برغل وسميد
استعملت كوبين سميد مع كوب برغل ورشةملح  ورشة بهار وكمون وخبطتهم سوى ورشيت عليهم الماء تقريبا نصف كوب وتركتهم شوية وبعدها ارجع اعجنهم واشوف كمية الماء الي يحتاجها اضيف مع الخلط بيدي واشوف حاجة العجين للماء  وبالمكينة فرمتهم ومن تشوفوها شوية قوية رشوا ماء عليها بس مو هواية حتى لاتفتح بالسلق وتصير لينة
الحشوة عبارة عن لحم مفروم يحمس الى ان يستوي ويضاف له بصل مفروم ناعم ويقلب الى ان يذبل البصل يضاف ملح وبهارات مشكلة ورشة دارسين وكبابة ويقلب نطفي النار ونترك الحشوة تبرد ونضيف الها بقدونس مفروم وكشمش ولوز حسب الرغبة
بعدها من تبرد الحشوة  ناخذ من العجين نفرش نايلون على كاونتر المطبخ ونضع العجين وفوقه نايلون ونفتحه
نقص العجين شكل دائرة ونضع الحشوة بنصف الدائرة  ونطبق الجهة الثانية عليها مع الضغط حتى نفرغ العجين من الهواء  ونغلق الجوانب زين ونقلب وايضا نضغط على الجانب حتى نتاكد  انه الكبة مراح تفتح بالسلق
اغلي ماء على النار واضيف له رشة ملح وصودا ومن يغلي اضيف الكبة اذا اريد احفظها بالفريز اسلقها نصف سلقة وابردها واحفظها وبحالة اذا نريد نقدمها اكمل السلق وتقدم او تقلى بعد السلق والف عافية
قسم سويتها كبة صغار تستعمل للشوربات والتبسي باذنجان او تسلق وتقدم مثل ماهي حسب مانحب
ايمان







Monday, 8 April 2013

فطائر سويسرول المشروم

فطائر سويسرول المشروم
بعجينة البف باستري
المقادير حسب الرغبة
المواد عجينة بف باستري
علبة مشروم طازج
حبة بصل مفروم ناعم
جبن موزريلا
رشة ملح وفلفل اسود ورشة اوريغانو
قليل من صلصة الطماطة او كاتشاب لدهن العجين
العمل
نحمر البصل بالقليل من الزيت وبعدها نضيف له مشروم مقطع ويحمر سوية ويضاف ملح وفلفل ورشة اوريغانو
نفتح عجينة البف على شكل مستطيل
وبعدها نمسح العجينة ببالكاتشاب او صلصة الطماطة
ونضيف خليط المشروم فوقها وبعدها نضيف رشة جبن موزريلا ورشة اوريغانو ونلف العجينة  اسطوانة
بخيط نايلون  او سكين حاد نقطع العجين حلقات ونرصها على ورق الزبدة  ونمسح الوجة بالقليل من الحليب وندخلها لفرن بحرارة 180 تقريبا 20 دقيقة تكون جاهزة
ايمان




الوصفات الشائعة

counter

Flag Counter

 

أشترك معنا عن طريق الايميل

X