Friday, 11 October 2013

كليجة العيد





حبايب لازم تعرفون ان الكليجه الطيبه المظبوطه مو بس مقادير مظبوطه 

اهم شي استخدام المواد الممتازه النوعيه 



مقادير العجينه : ل9 اكواب طحين . 
3 اكواب زبده . (يعني لكل 3 طحين واحد زبد ) 
كوب حليب باودر 
كيس خميره او ملعقتان كبيره خميره . 
ملعقه وسط سكر . 
ملعقه وسط بيكم باودر 
ملعقه كبيره هيل مطحون 
ملعقه كبيره ملح 
2 ملعقه اكل دهن حر (حسب الرغبه ) 
ماء دافئ للعجن 
لا حظتوا المواد الي استخمتها زبد لورباك الحيواني نكهته تحفه ويعطي قرمشه للكيجه وايضا استخدمت اجود انواع الطحين بعد تجار ب طويله مع مختلف الانواع استقريت على افضل الانواع ومو شرط افضل نوع هو اغلى نوع المهم انتي تجربيه 
اول خطوه انخل الطحين 
الخطوه الثانيه اذوب الزبد مع ملعقتين دهن الحر اما على النار او بالمايكرو 
اذوبه فقط يعني احاول ما يصير دافئ 
لاحظوا اكو قطع بعد ما ذابت كلها 
حتى لا يسود العجين ويبقى ابيض 
نضيف ملعقه السكر على الخميره مع ماء دافئ قليلا ونتركها جانبا 


نمزج المواد الجافه مع الطحين المنخول 


ملح , حليب . هيل . بيكم باودر 

ملاحظه: ضفت البيكم باودر ليعطي هشاشه للكليجه وتطلع منفوشه 
اذا تحبين الكليجه كلها مقرمشه وما منفوشه استغني عن البيكم وباودر واستعملي فقط الخميره



نظيف الزبد الذائب فوق المزيج ونفرك باليد حتى يتجانس المزيج مع الزبد 

ويصبح بهذا الشكل المفتت 


نظيف الخميره ونقلبها في الخليط 

لاحظوا كيف اتضاعفت 



ونعجن بماء دافئ حتتى نحصل على عجينه طريه متماسكه 

ونغلفها بالنايلون ثم بقماش ونضعها في مكان دافئ لمده ساعه 
ونعجنها من جديد 
ونغلفها مره ثانيه ونتركها ساعه اخرى 



عجينه الكليجه تطلع بهذا الشكل يعني مو ملسه ومتساويه بسبب كميه الزبد الي بيها 



الحشوات 

حسب الذوق 
التمر نزعت النوعه عنه وثرمته بايدي نااعم وحمسته على النار مع ملعقه زبد ورشه هيل حتى صار طري 
و جوز دكيته اشويه مع السكر 
مبروش مع بندق محمص مكسر وسكر 


وهذه طرق الف نزلتها سابقا 

بس خواتي ايضا سالوا عنها 
اتمنى تكون واضحه

طريقه ورده التمر 
هذه قطعه من العجينه 
ومن التمر المنزوع النوى والمحموس بالزبد واشويه هيل 

نفتح العجين بشكل قرص باليد ونفتح التمر ايضا لكن بقرص اصغر اشويه 
ونغلق العجينه على التمر ونعدلها بالشيبك بشكل قرص ونقطع الحواف بالسكين بدون ما نوصل للوسط 

ونبدي كل قطعه نلفها باتجاه واحد 
يعني نطويها بنفس الاتجاه 

ودائما حاولو تخلون ورق الزبده على صينيه الفرن حتى يطلع شغلكم نضيف ومستوي من كل الجهات بالتساوي 

وباقي الحشوات استخدمت القوالب 

ملاحظه : اجتني اساله عن كيف نخلي الكليجه ما تنفتح بالفرن 
صراحه هذه المشكله عانيت منها , تطلع عندي قطع مفتوحه بالفرن 
حاولي بعد ما تشكليهم وتكملين الصينيه ترجعين تظغطين على كل قطعه لان رح تكون مختمره اكثر 
وبعدين دهني الوجه بالبيض او السكر او الحليب 
وخليهم بالفرن على نار عاليه يعني 200 ومن تلزم العجينه قلللي النار الى 180 
بهذه الطريقه ما رح تنطين مجال للعجينه تنفتح بالفرن 

ان شاء الله اكون سهلت عليكم طريقه عمل الكليجه 
ورقاء



الوصفات الشائعة

counter

Flag Counter

 

أشترك معنا عن طريق الايميل

X